ਦੁਬਈ ਵਿੱਚ ਪਹਿਲੀ ਵਾਰੀ ਘਰ ਖਰੀਦਣ ਵਾਲਿਆਂ ਲਈ ਖ਼ਾਸ ਪ੍ਰੋਗਰਾਮ: ਕੀ ਹਨ ਲਾਭ ਅਤੇ ਅਰਜ਼ੀ ਕਿਵੇਂ ਦੇਣੀ ਹੈ
ਦੁਬਈ, 26 ਅਗਸਤ- ਦੁਬਈ ਵਿੱਚ ਘਰ ਖਰੀਦਣ ਦਾ ਸੁਪਨਾ ਦੇਖਣ ਵਾਲਿਆਂ ਲਈ ਇੱਕ ਵੱਡੀ ਖੁਸ਼ਖਬਰੀ ਆਈ ਹੈ। ਦੁਬਈ ਲੈਂਡ ਡਿਪਾਰਟਮੈਂਟ ਨੇ ਜੁਲਾਈ 2025 ਵਿੱਚ ਇੱਕ ਨਵਾਂ ਪ੍ਰੋਗਰਾਮ ਸ਼ੁਰੂ ਕੀਤਾ ਹੈ ਜੋ ਉਹਨਾਂ ਲੋਕਾਂ ਲਈ ਹੈ ਜਿਨ੍ਹਾਂ ਨੇ ਪਹਿਲੀ ਵਾਰ ਦੁਬਈ ਵਿੱਚ ਆਪਣਾ ਘਰ ਲੈਣਾ ਹੈ। ਇਹ ਪ੍ਰੋਗਰਾਮ ਸਿਰਫ਼ ਘਰ ਖਰੀਦਣ ਦੀ ਪ੍ਰਕਿਰਿਆ ਨੂੰ ਆਸਾਨ ਨਹੀਂ ਬਣਾਉਂਦਾ, ਸਗੋਂ ਇਸ ਨਾਲ ਜੁੜੇ ਖਰਚੇ ਅਤੇ ਫਾਇਨੈਨਸ਼ੀਅਲੀ ਬਡਨ ਨੂੰ ਵੀ ਘਟਾਉਣ ਵਿੱਚ ਮਦਦ ਕਰਦਾ ਹੈ।
ਇਸ ਯੋਜਨਾ ਦੇ ਤਹਿਤ ਨਵੇਂ ਖਰੀਦਦਾਰਾਂ ਨੂੰ ਕਈ ਖ਼ਾਸ ਸੁਵਿਧਾਵਾਂ ਦਿੱਤੀਆਂ ਜਾ ਰਹੀਆਂ ਹਨ। ਸਭ ਤੋਂ ਵੱਡੀ ਗੱਲ ਇਹ ਹੈ ਕਿ ਉਨ੍ਹਾਂ ਨੂੰ ਵੱਡੇ ਡਿਵੈਲਪਰਾਂ ਵੱਲੋਂ ਨਵੇਂ ਪ੍ਰੋਜੈਕਟਾਂ ਵਿੱਚ ਪਹਿਲ ਮਿਲੇਗੀ। ਇਸ ਤੋਂ ਇਲਾਵਾ, ਛੂਟ ਵਾਲੀਆਂ ਕੀਮਤਾਂ, ਆਸਾਨ ਕਿਸ਼ਤਾਂ, ਬੈਂਕਾਂ ਵੱਲੋਂ ਘੱਟ ਵਿਆਜ ਦਰਾਂ ਤੇ ਖ਼ਾਸ ਪੈਕੇਜ ਵੀ ਉਪਲਬਧ ਹੋਣਗੇ।
ਦੁਬਈ ਵਿੱਚ ਰਹਿੰਦੇ ਹਰ ਕਿਸੇ ਲਈ ਇਹ ਮੌਕਾ ਖੁੱਲਾ ਹੈ, ਭਾਵੇਂ ਉਹ ਕਿਸੇ ਵੀ ਦੇਸ਼ ਤੋਂ ਹੋਣ। ਸ਼ਰਤਾਂ ਵਿੱਚ ਇਹ ਹੈ ਕਿ ਐਪਲੀਕੈਂਟ ਘੱਟੋ-ਘੱਟ 18 ਸਾਲ ਦਾ ਹੋਵੇ, ਉਸਦਾ ਪਹਿਲਾਂ ਦੁਬਈ ਵਿੱਚ ਕੋਈ ਫ਼ਰੀਹੋਲਡ ਰਿਹਾਇਸ਼ੀ ਘਰ ਨਾ ਹੋਵੇ ਅਤੇ ਜੋ ਜਾਇਦਾਦ ਖਰੀਦੀ ਜਾ ਰਹੀ ਹੈ ਉਸਦੀ ਕੀਮਤ ਪੰਜ ਮਿਲੀਅਨ ਦਿਰਹਮ ਤੋਂ ਘੱਟ ਹੋਵੇ। ਜੇ ਕਿਸੇ ਦੇ ਕੋਲ ਗੈਰ-ਫ਼ਰੀਹੋਲਡ ਖੇਤਰ ਵਿੱਚ ਘਰ ਹੈ, ਉਹ ਫਿਰ ਵੀ ਇਸ ਯੋਜਨਾ ਲਈ ਯੋਗ ਰਹੇਗਾ।
ਇਹ ਯੋਜਨਾ ਖ਼ਾਸ ਤੌਰ ’ਤੇ ਉਹਨਾਂ ਲਈ ਹੈ ਜੋ ਪਹਿਲੀ ਵਾਰ ਘਰ ਖਰੀਦਣ ਦੀ ਹਿੰਮਤ ਕਰ ਰਹੇ ਹਨ। ਉਦਾਹਰਣ ਵਜੋਂ, ਕੁਝ ਵੱਡੇ ਡਿਵੈਲਪਰ ਜਿਵੇਂ ਕਿ ਵਸਲ ਗਰੁੱਪ ਨੇ ਜੇਬਲ ਅਲੀ ਵਿੱਚ ਨਵੇਂ ਪ੍ਰਾਜੈਕਟ ਖ਼ਾਸ ਤੌਰ ’ਤੇ ਪਹਿਲੀ ਵਾਰੀ ਖਰੀਦਦਾਰਾਂ ਲਈ ਲਾਂਚ ਕੀਤੇ ਹਨ। ਇਸੇ ਤਰ੍ਹਾਂ, ਬਿੰਘਾਟੀ ਪ੍ਰਾਪਰਟੀਜ਼ ਵੱਲੋਂ ਹਰ ਪ੍ਰਾਜੈਕਟ ’ਤੇ ਪੰਜ ਪ੍ਰਤੀਸ਼ਤ ਦੀ ਛੂਟ ਦਿੱਤੀ ਜਾ ਰਹੀ ਹੈ, ਬਿਨਾਂ ਕਿਸੇ ਖੇਤਰ ਦੀ ਸੀਮਾ ਰੱਖੇ।
ਘਰ ਖਰੀਦਣ ਵਾਲਿਆਂ ਲਈ ਇਕ ਹੋਰ ਵੱਡਾ ਫ਼ਾਇਦਾ ਇਹ ਹੈ ਕਿ ਰਜਿਸਟ੍ਰੇਸ਼ਨ ਫੀਸ ਨੂੰ ਵੀ ਆਸਾਨ ਕਿਸ਼ਤਾਂ ਵਿੱਚ ਭਰਿਆ ਜਾ ਸਕੇਗਾ। ਕੁਝ ਬੈਂਕਾਂ ਨੇ ਤਾਂ ਖ਼ਾਸ ਕਰਕੇ ਬਿਨਾਂ ਵਿਆਜ ਵਾਲੀਆਂ ਕਰੈਡਿਟ ਕਾਰਡ ਇੰਸਟਾਲਮੈਂਟ ਯੋਜਨਾਵਾਂ ਵੀ ਸ਼ੁਰੂ ਕੀਤੀਆਂ ਹਨ। ਇਸ ਨਾਲ ਉਹਨਾਂ ਲੋਕਾਂ ਲਈ ਰਾਹ ਸੌਖਾ ਹੋਵੇਗਾ ਜਿਹੜੇ ਪਹਿਲਾਂ ਡਰਦੇ ਸਨ ਕਿ ਸ਼ੁਰੂਆਤੀ ਖਰਚਾ ਇਕ ਵਾਰ ਵਿੱਚ ਕਿਵੇਂ ਪੂਰਾ ਕਰਾਂ।
ਦੁਬਈ ਦੇ ਸਭ ਤੋਂ ਮਸ਼ਹੂਰ ਡਿਵੈਲਪਰ ਇਸ ਯੋਜਨਾ ਨਾਲ ਜੁੜ ਗਏ ਹਨ। ਇਨ੍ਹਾਂ ਵਿੱਚ ਇਮਾਰ, ਨਖੀਲ, ਡਾਮਾਕ, ਮਿਰਾਸ, ਦੁਬਈ ਪ੍ਰਾਪਰਟੀਜ਼, ਅਜ਼ੀਜ਼ੀ ਡਿਵੈਲਪਮੈਂਟਸ, ਐਲਿੰਗਟਨ, ਮਜੀਦ ਅਲ ਫੁੱਤਈਮ ਅਤੇ ਹੋਰ ਕਈ ਨਾਮ ਸ਼ਾਮਲ ਹਨ। ਇਹ ਸਾਰੇ ਡਿਵੈਲਪਰ ਆਪਣੇ ਵੱਖ-ਵੱਖ ਪ੍ਰਾਜੈਕਟਾਂ ਵਿੱਚ ਉਹ ਘਰ ਪੇਸ਼ ਕਰ ਰਹੇ ਹਨ ਜਿਨ੍ਹਾਂ ਦੀ ਕੀਮਤ ਪੰਜ ਮਿਲੀਅਨ ਦਿਰਹਮ ਤੋਂ ਘੱਟ ਹੈ।
ਸਿਰਫ਼ ਡਿਵੈਲਪਰ ਹੀ ਨਹੀਂ, ਬੈਂਕ ਵੀ ਇਸ ਯੋਜਨਾ ਦਾ ਹਿੱਸਾ ਹਨ। ਇਮਾਰਤ ਦੇ ਵੱਡੇ ਬੈਂਕਾਂ ਜਿਵੇਂ ਕਿ ਇਮਿਰੇਟਸ ਐਨਬੀਡੀ, ਦੁਬਈ ਇਸਲਾਮਿਕ ਬੈਂਕ, ਮਸ਼ਰਿਕ ਅਤੇ ਕਮਰਸ਼ੀਅਲ ਬੈਂਕ ਆਫ਼ ਦੁਬਈ ਖ਼ਾਸ ਮੋਰਟਗੇਜ ਸਕੀਮਾਂ ਲੈ ਕੇ ਆਏ ਹਨ। ਇਹਨਾਂ ਵਿੱਚ ਵਿਆਜ ਦਰ ਘੱਟ ਹੋਣ ਦੇ ਨਾਲ-ਨਾਲ ਲੋਨ ਮਨਜ਼ੂਰੀ ਦੀ ਪ੍ਰਕਿਰਿਆ ਵੀ ਤੇਜ਼ ਕੀਤੀ ਗਈ ਹੈ।
ਘਰ ਖਰੀਦਣ ਦੇ ਨਾਲ ਜੁੜੀ ਇੱਕ ਹੋਰ ਖ਼ਾਸ ਚੀਜ਼ ਗੋਲਡਨ ਵੀਜ਼ਾ ਦੀ ਸੰਭਾਵਨਾ ਹੈ। ਜੇਕਰ ਕੋਈ ਵਿਅਕਤੀ ਦੁਬਈ ਵਿੱਚ ਦੋ ਮਿਲੀਅਨ ਦਿਰਹਮ ਜਾਂ ਇਸ ਤੋਂ ਵੱਧ ਦੀ ਜਾਇਦਾਦ ਵਿੱਚ ਨਿਵੇਸ਼ ਕਰਦਾ ਹੈ, ਤਾਂ ਉਸਨੂੰ ਦਸ ਸਾਲ ਦਾ ਗੋਲਡਨ ਵੀਜ਼ਾ ਮਿਲ ਸਕਦਾ ਹੈ। ਇਹ ਵੀਜ਼ਾ ਸਿਰਫ਼ ਲੰਮੇ ਸਮੇਂ ਦੀ ਰਿਹਾਇਸ਼ ਨਹੀਂ ਦਿੰਦਾ, ਸਗੋਂ ਜੀਵਨ ਦੇ ਕਈ ਹੋਰ ਖੇਤਰਾਂ ਵਿੱਚ ਵੀ ਆਸਾਨੀਆਂ ਲਿਆਉਂਦਾ ਹੈ।
ਆਪਲੀਕੇਸ਼ਨ ਦੀ ਪ੍ਰਕਿਰਿਆ ਵੀ ਬਹੁਤ ਆਸਾਨ ਰੱਖੀ ਗਈ ਹੈ। ਕੋਈ ਵੀ ਯੋਗ ਉਮੀਦਵਾਰ ਦੁਬਈ ਲੈਂਡ ਡਿਪਾਰਟਮੈਂਟ ਦੀ ਵੈਬਸਾਈਟ ਜਾਂ ‘ਦੁਬਈ ਰੈਸਟ’ ਐਪ ਰਾਹੀਂ ਰਜਿਸਟਰ ਕਰ ਸਕਦਾ ਹੈ। ਸਾਰੀ ਜਾਣਕਾਰੀ ਔਨਲਾਈਨ ਭੇਜਣ ਤੋਂ ਬਾਅਦ ਯੋਗ ਅਰਜ਼ੀਕਾਰ ਨੂੰ ਇੱਕ ਕਿਊਆਰ ਕੋਡ ਵਾਲਾ ਈਮੇਲ ਮਿਲਦਾ ਹੈ। ਇਸ ਕੋਡ ਰਾਹੀਂ ਉਹ ਡਿਵੈਲਪਰਾਂ ਅਤੇ ਬੈਂਕਾਂ ਦੀਆਂ ਖ਼ਾਸ ਪੇਸ਼ਕਸ਼ਾਂ ਤੱਕ ਪਹੁੰਚ ਸਕਦਾ ਹੈ। ਇਹ ਕੋਡ ਉਸ ਸਮੇਂ ਤੱਕ ਵੈਲਿਡ ਰਹਿੰਦਾ ਹੈ ਜਦ ਤੱਕ ਖਰੀਦਦਾਰ ਆਪਣਾ ਘਰ ਰਜਿਸਟਰ ਨਹੀਂ ਕਰਾ ਲੈਂਦਾ।
ਇਸ ਪ੍ਰੋਗਰਾਮ ਵਿੱਚ ਸ਼ਾਮਲ ਹੋਣ ਲਈ ਕੋਈ ਵੱਖਰੀ ਫੀਸ ਨਹੀਂ ਹੈ। ਸਿਰਫ਼ ਆਮ ਰਜਿਸਟ੍ਰੇਸ਼ਨ ਫੀਸਾਂ, ਬੈਂਕਾਂ ਜਾਂ ਡਿਵੈਲਪਰਾਂ ਦੇ ਚਾਰਜ ਲਾਗੂ ਹੁੰਦੇ ਹਨ, ਪਰ ਕਈ ਵਾਰ ਇਹ ਵੀ ਖ਼ਾਸ ਪੇਸ਼ਕਸ਼ਾਂ ਦੇ ਤਹਿਤ ਮੁਆਫ਼ ਕੀਤੇ ਜਾ ਸਕਦੇ ਹਨ।
ਦੁਬਈ ਦੀ ਜਾਇਦਾਦ ਮਾਰਕੀਟ ਹਮੇਸ਼ਾਂ ਹੀ ਵਿਦੇਸ਼ੀਆਂ ਲਈ ਖਾਸ ਰਹੀ ਹੈ, ਪਰ ਹੁਣ ਜਦੋਂ ਪਹਿਲੀ ਵਾਰ ਖਰੀਦਦਾਰਾਂ ਲਈ ਰਸਤਾ ਹੋਰ ਵੀ ਸੌਖਾ ਕਰ ਦਿੱਤਾ ਗਿਆ ਹੈ, ਇਸ ਨਾਲ ਮਿਡਲ ਕਲਾਸ ਅਤੇ ਨਵੇਂ ਨਿਵੇਸ਼ਕ ਵੀ ਬਿਨਾਂ ਡਰ ਦੇ ਆਪਣਾ ਸੁਪਨਾ ਪੂਰਾ ਕਰ ਸਕਣਗੇ। ਵਿਦਵਾਨ ਮੰਨਦੇ ਹਨ ਕਿ ਇਹ ਯੋਜਨਾ ਨਾ ਸਿਰਫ਼ ਘਰ ਖਰੀਦਦਾਰਾਂ ਦੀ ਗਿਣਤੀ ਵਧਾਏਗੀ, ਸਗੋਂ ਪੂਰੀ ਰੀਅਲ ਇਸਟੇਟ ਮਾਰਕਿਟ ਵਿੱਚ ਨਵੀਂ ਰੌਣਕ ਲਿਆਵੇਗੀ।
