ਛੁੱਟੀਆਂ ਦੀ ਯੋਜਨਾ ਬਣਾ ਰਹੇ ਹੋ? ਇਹ 2 ਦਿਨ ਤੁਹਾਡੀਆਂ ਉਡਾਣਾਂ 'ਤੇ ਹਜ਼ਾਰਾਂ ਦੀ ਬਚਤ ਕਰ ਸਕਦੇ ਹਨ
ਯੂਏਈ, 3 ਅਕਤੂਬਰ- ਯੂਏਈ ਵਿੱਚ ਰਹਿੰਦੇ ਉਹ ਲੋਕ ਜੋ ਇਸ ਪਤਝੜ ਵਿੱਚ ਛੁੱਟੀਆਂ ਮਨਾਉਣ ਦੀ ਯੋਜਨਾ ਬਣਾ ਰਹੇ ਹਨ, ਉਨ੍ਹਾਂ ਲਈ ਇੱਕ ਖ਼ਾਸ ਖ਼ਬਰ ਹੈ। ਟ੍ਰੈਵਲ ਇੰਡਸਟਰੀ ਦੇ ਵਿਸ਼ਲੇਸ਼ਣ ਅਨੁਸਾਰ, ਨਵੰਬਰ ਮਹੀਨੇ ਦੀਆਂ ਕੁਝ ਤਾਰੀਖਾਂ ਤੇ ਉਡਾਣਾਂ ਦੀਆਂ ਕੀਮਤਾਂ ਸਭ ਤੋਂ ਘੱਟ ਰਹਿਣਗੀਆਂ। ਐਕਸਪੀਡੀਆ ਵੱਲੋਂ ਜਾਰੀ ਰਿਪੋਰਟ ਮੁਤਾਬਕ, 11 ਨਵੰਬਰ ਅਤੇ 19 ਨਵੰਬਰ ਉਹ ਦਿਨ ਹਨ ਜਦੋਂ ਯਾਤਰੀਆਂ ਨੂੰ ਟਿਕਟਾਂ ਸਭ ਤੋਂ ਸਸਤੇ ਭਾਅ ‘ਤੇ ਮਿਲ ਸਕਦੀਆਂ ਹਨ। ਇਸ ਦੇ ਉਲਟ, 24 ਨਵੰਬਰ ਨੂੰ ਉਡਾਣਾਂ ਸਭ ਤੋਂ ਮਹਿੰਗੀਆਂ ਹੋਣਗੀਆਂ। ਇਸੇ ਦੌਰਾਨ 20 ਤੋਂ 22 ਨਵੰਬਰ ਦੇ ਵਿਚਕਾਰ ਦੀਆਂ ਤਾਰੀਖਾਂ ਉਹਨਾਂ ਲਈ ਬਿਹਤਰ ਮੰਨੀਆਂ ਜਾ ਰਹੀਆਂ ਹਨ ਜੋ ਘੱਟ ਭੀੜ ਵਾਲੇ ਹਵਾਈ ਅੱਡਿਆਂ ਤੇ ਸ਼ਾਂਤ ਯਾਤਰਾ ਦਾ ਤਜ਼ਰਬਾ ਲੱਭ ਰਹੇ ਹਨ।
ਵਿਸ਼ਲੇਸ਼ਕ ਮੰਨਦੇ ਹਨ ਕਿ ਨਵੰਬਰ ਦਾ ਸਮਾਂ ਯਾਤਰੀਆਂ ਲਈ “ਗੋਲਡਨ ਵਿੰਡੋ” ਹੈ। ਗਰਮੀਆਂ ਦੀਆਂ ਛੁੱਟੀਆਂ ਮੁੱਕਣ ਤੋਂ ਬਾਅਦ ਅਤੇ ਸਰਦੀਆਂ ਦੀਆਂ ਛੁੱਟੀਆਂ ਸ਼ੁਰੂ ਹੋਣ ਤੋਂ ਪਹਿਲਾਂ, ਇਸ ਮਹੀਨੇ ਵਿਚ ਯਾਤਰਾ ਦੀ ਮੰਗ ਕੁਝ ਘੱਟ ਰਹਿੰਦੀ ਹੈ। ਇਸ ਕਰਕੇ ਏਅਰਲਾਈਨਜ਼ ਨਾ ਸਿਰਫ਼ ਕਿਰਾਏ ਘਟਾਉਂਦੀਆਂ ਹਨ, ਬਲਕਿ ਹੋਟਲਾਂ ਦੀਆਂ ਦਰਾਂ ਵੀ ਕਾਫ਼ੀ ਸਸੀਆਂ ਹੋ ਜਾਂਦੀਆਂ ਹਨ। ਐਕਸਪੀਡੀਆ ਗਰੁੱਪ ਦੀ ਜਨ ਸੰਪਰਕ ਮੁਖੀ ਮੇਲਾਨੀ ਫਿਸ਼ ਕਹਿੰਦੀ ਹੈ ਕਿ ਇਹ ਸਮਾਂ ਉਹ ਯਾਤਰੀਆਂ ਲਈ ਸਭ ਤੋਂ ਵਧੀਆ ਹੈ ਜੋ ਸੰਯੁਕਤ ਰਾਜ, ਕੈਨੇਡਾ ਜਾਂ ਹੋਰ ਲੰਬੀ ਦੂਰੀ ਵਾਲੀਆਂ ਮੰਜ਼ਿਲਾਂ ‘ਤੇ ਜਾਣ ਦਾ ਸੁਪਨਾ ਰੱਖਦੇ ਹਨ। ਨਵੰਬਰ ਦੇ ਮੱਧ ਵਿੱਚ ਸੜਕਾਂ ਤੇ ਹਵਾਈ ਅੱਡੇ ਵੀ ਤੁਲਨਾਤਮਕ ਤੌਰ ‘ਤੇ ਸ਼ਾਂਤ ਰਹਿੰਦੇ ਹਨ, ਜਿਸ ਨਾਲ ਯਾਤਰਾ ਹੋਰ ਵੀ ਆਰਾਮਦਾਇਕ ਬਣਦੀ ਹੈ।
ਯੂਏਈ ਵਿੱਚ ਟੂਰ ਆਪਰੇਟਰ ਪਹਿਲਾਂ ਹੀ ਨਵੰਬਰ ਮਹੀਨੇ ਲਈ ਬੁਕਿੰਗਾਂ ਵਿੱਚ ਵਾਧਾ ਦੇਖ ਰਹੇ ਹਨ। ਰੂਹ ਟੂਰਿਜ਼ਮ ਦੇ ਸੇਲਜ਼ ਹੈੱਡ ਲਿਬਿਨ ਵਰਗੀਸ ਨੇ ਦੱਸਿਆ ਕਿ ਨਿਵਾਸੀਆਂ ਵਿੱਚ ਜਾਰਜੀਆ, ਅਜ਼ਰਬਾਈਜਾਨ, ਅਰਮੀਨੀਆ ਅਤੇ ਪੂਰਬੀ ਯੂਰਪ ਲਈ ਵੱਡੀ ਦਿਲਚਸਪੀ ਦੇਖੀ ਜਾ ਰਹੀ ਹੈ। ਇਨ੍ਹਾਂ ਦੇ ਨਾਲ-ਨਾਲ, ਕਈ ਪਰਿਵਾਰ ਆਸਟ੍ਰੇਲੀਆ, ਦੂਰ ਪੂਰਬ ਅਤੇ ਕੈਨੇਡਾ ਵਰਗੀਆਂ ਦੂਰਦਰਾਜ਼ ਮੰਜ਼ਿਲਾਂ ਵੱਲ ਵੀ ਰੁਝਾਨ ਦਿਖਾ ਰਹੇ ਹਨ। ਸਰਦੀਆਂ ਦੇ ਤਿਉਹਾਰ, ਨਿਆਗਰਾ ਫਾਲਸ ਅਤੇ ਕੁਦਰਤੀ ਦ੍ਰਿਸ਼ਿਆਂ ਵਾਲੇ ਸਥਾਨ ਇਸ ਵੇਲੇ ਸਭ ਤੋਂ ਵੱਧ ਖਿੱਚ ਪੈਦਾ ਕਰ ਰਹੇ ਹਨ।
ਵਰਗੀਸ ਨੇ ਇਹ ਵੀ ਕਿਹਾ ਕਿ ਹਵਾਈ ਕਿਰਾਏ ਦੀਆਂ ਕੀਮਤਾਂ ਵਿੱਚ ਗਿਰਾਵਟ ਇਸ ਸਾਲ ਬੁਕਿੰਗਾਂ ਨੂੰ ਤੇਜ਼ੀ ਨਾਲ ਵਧਾ ਰਹੀ ਹੈ। ਗਰਮੀਆਂ ਦੇ ਮੌਸਮ ਦੌਰਾਨ ਜਿੱਥੇ ਟਿਕਟਾਂ ਦੀਆਂ ਕੀਮਤਾਂ ਉੱਚੀਆਂ ਰਹਿੰਦੀਆਂ ਹਨ, ਓਥੇ ਹੀ ਨਵੰਬਰ ਵਿੱਚ ਉਹ ਬਹੁਤ ਆਕਰਸ਼ਕ ਦਰਾਂ ‘ਤੇ ਮਿਲਦੀਆਂ ਹਨ। ਦਸੰਬਰ ਦੇ ਸ਼ੁਰੂਆਤੀ ਦਿਨਾਂ ਵਿੱਚ ਵੀ ਇਹ ਰੁਝਾਨ ਜਾਰੀ ਰਹੇਗਾ, ਜਿਸ ਨਾਲ ਯੂਏਈ ਦੇ ਰਹਿਣ ਵਾਲਿਆਂ ਨੂੰ ਆਪਣੀਆਂ ਸਰਦੀਆਂ ਦੀਆਂ ਛੁੱਟੀਆਂ ਬੇਝਿਝਕ ਯੋਜਨਾ ਬਣਾਉਣ ਦਾ ਮੌਕਾ ਮਿਲੇਗਾ।
ਯਾਤਰਾ ਦੇ ਰੁਝਾਨਾਂ ਵਿੱਚ ਵੀ ਬਦਲਾਅ ਵੇਖਣ ਨੂੰ ਮਿਲ ਰਹੇ ਹਨ। ਪਹਿਲਾਂ ਸੈਲਾਨੀ ਧੁੱਪ ਵਾਲੇ ਟਾਪੂਆਂ ਜਿਵੇਂ ਕੋਹ ਸਮੂਈ, ਮੈਲੋਰਕਾ ਜਾਂ ਇਬੀਜ਼ਾ ਵੱਲ ਖਿੱਚਦੇ ਸਨ, ਪਰ ਹੁਣ ਲੋਕ ਸੱਭਿਆਚਾਰ ਅਤੇ ਇਤਿਹਾਸ ਨਾਲ ਭਰਪੂਰ ਸ਼ਹਿਰਾਂ ਜਿਵੇਂ ਕੋਪਨਹੇਗਨ, ਪ੍ਰਾਗ ਅਤੇ ਓਸਾਕਾ ਨੂੰ ਚੁਣ ਰਹੇ ਹਨ। ਸਾਹਸ ਦੇ ਸ਼ੌਕੀਨਾਂ ਲਈ ਆਈਸਲੈਂਡ ਅਤੇ ਨਿਆਗਰਾ ਫਾਲ ਵਰਗੇ ਸਥਾਨ ਸਭ ਤੋਂ ਵਧੀਆ ਚੋਣ ਬਣ ਰਹੇ ਹਨ, ਕਿਉਂਕਿ ਇਨ੍ਹਾਂ ਦੇ ਕੁਦਰਤੀ ਦ੍ਰਿਸ਼ ਅਤੇ ਵਿਲੱਖਣ ਤਜ਼ਰਬੇ ਜ਼ਿੰਦਗੀ ਭਰ ਦੀ ਯਾਦ ਬਣ ਸਕਦੇ ਹਨ।
ਟ੍ਰੈਵਲ ਮਾਹਿਰਾਂ ਦੀ ਸਲਾਹ ਹੈ ਕਿ ਯਾਤਰੀਆਂ ਨੂੰ ਟਿਕਟਾਂ ਬੁੱਕ ਕਰਨ ਤੋਂ ਪਹਿਲਾਂ ਕੀਮਤਾਂ ਲਈ ਚੇਤਾਵਨੀਆਂ ਲਗਾਉਣੀਆਂ ਚਾਹੀਦੀਆਂ ਹਨ। ਇਸ ਤੋਂ ਇਲਾਵਾ, ਉਹਨਾਂ ਨੂੰ ਹੋਟਲਾਂ ਦੀਆਂ ਉਹ ਯੋਜਨਾਵਾਂ ਚੁਣਨੀਆਂ ਚਾਹੀਦੀਆਂ ਹਨ ਜਿਹਨਾਂ ਵਿੱਚ ਲਚਕਦਾਰ ਕੈਨਸਲੇਸ਼ਨ ਦੀ ਸਹੂਲਤ ਹੋਵੇ। ਸਭ ਤੋਂ ਵੱਧ ਬਚਤ ਲਈ, ਉਡਾਣ ਅਤੇ ਰਿਹਾਇਸ਼ ਨੂੰ ਇੱਕ ਪੈਕੇਜ ਵਜੋਂ ਬੁੱਕ ਕਰਨਾ ਹੋਰ ਵੀ ਫਾਇਦੇਮੰਦ ਰਹੇਗਾ।
ਮਾਹਿਰਾਂ ਦੇ ਅਨੁਸਾਰ, ਜੇ ਯੂਏਈ ਦੇ ਨਿਵਾਸੀ ਨਵੰਬਰ ਦੇ ਮੱਧ ਵਿੱਚ ਆਪਣੀਆਂ ਯਾਤਰਾਵਾਂ ਦੀ ਯੋਜਨਾ ਬਣਾਉਣ ਤਾਂ ਉਹ ਹਵਾਈ ਕਿਰਾਏ ‘ਤੇ ਹਜ਼ਾਰਾਂ ਦੀ ਬਚਤ ਕਰ ਸਕਦੇ ਹਨ ਅਤੇ ਆਪਣੀ ਬਕੇਟ ਲਿਸਟ ਵਿੱਚ ਸ਼ਾਮਲ ਮੰਜ਼ਿਲਾਂ ‘ਤੇ ਪਹੁੰਚ ਸਕਦੇ ਹਨ।
