ਗੀਸੇਲ ਪੇਲੀਕੋਟ ਨੇ ਦੋਸ਼ੀ ਬਲਾਤਕਾਰੀ ਨੂੰ 'ਜ਼ਿੰਮੇਵਾਰੀ ਲੈਣ' ਦੀ ਅਪੀਲ ਕੀਤੀ

ਨਾਈਮਸ, 9 ਅਕਤੂਬਰ- ਦੱਖਣੀ ਫਰਾਂਸ ਦੇ ਸ਼ਹਿਰ ਨਾਈਮਸ ਦੀ ਅਦਾਲਤ ਵਿੱਚ ਬੁੱਧਵਾਰ ਨੂੰ ਗੀਸੇਲ ਪੇਲੀਕੋਟ ਦੀ ਆਵਾਜ਼ ਇੱਕ ਵਾਰ ਫਿਰ ਸਾਰੇ ਹਾਲ ਵਿੱਚ ਗੂੰਜੀ। 72 ਸਾਲਾ ਇਹ ਔਰਤ, ਜਿਸਦਾ ਨਾਮ ਪਿਛਲੇ ਸਾਲ ਇੱਕ ਡਰਾਉਣੇ ਸਮੂਹਿਕ ਬਲਾਤਕਾਰ ਮਾਮਲੇ ਨਾਲ ਜੁੜ ਕੇ ਨਾਰੀ ਸ਼ਕਤੀ ਦੀ ਪ੍ਰਤੀਕ ਬਣ ਗਿਆ ਸੀ, ਹੁਣ ਫਿਰ ਇੱਕ ਨਵੇਂ ਪੜਾਅ ਵਿੱਚ ਖੜੀ ਹੈ। ਉਸਨੇ ਉਸ ਆਦਮੀ ਨੂੰ ਸਿੱਧਾ ਚੁਣੌਤੀ ਦਿੱਤੀ ਜੋ ਅਜੇ ਵੀ ਦੋਸ਼ਾਂ ਨੂੰ ਝੁਠਲਾ ਰਿਹਾ ਹੈ "ਤੂੰ ਮੇਰੇ ਨਾਲ ਬਲਾਤਕਾਰ ਕੀਤਾ, ਹੁਣ ਆਪਣੇ ਕਰਤੂਤਾਂ ਦੀ ਜ਼ਿੰਮੇਵਾਰੀ ਲੈ।"

ਗੀਸੇਲ ਦਾ ਸਾਬਕਾ ਪਤੀ, ਡੋਮਿਨਿਕ ਪੇਲੀਕੋਟ, ਪਹਿਲਾਂ ਹੀ ਮੰਨ ਚੁੱਕਾ ਹੈ ਕਿ ਉਸਨੇ ਆਪਣੀ ਪਤਨੀ ਨੂੰ ਲਗਾਤਾਰ ਨਸ਼ੀਲੀ ਦਵਾਈਆਂ ਦੇ ਕੇ ਬੇਹੋਸ਼ ਰੱਖਿਆ ਅਤੇ ਦਰਜਨਾਂ ਅਜਨਬੀਆਂ ਨੂੰ ਉਸ ਨਾਲ ਬਦਸਲੂਕੀ ਕਰਨ ਲਈ ਸੱਦਾ ਦਿੱਤਾ। ਇਹ ਕਾਲਾ ਅਧਿਆਇ ਲਗਭਗ ਇੱਕ ਦਹਾਕੇ ਤੱਕ ਚਲਿਆ। ਇਸ ਮਾਮਲੇ ਨੇ ਸਿਰਫ਼ ਫਰਾਂਸ ਨਹੀਂ, ਸਾਰੀ ਦੁਨੀਆ ਨੂੰ ਹਿਲਾ ਦਿੱਤਾ ਸੀ। ਡੋਮਿਨਿਕ ਨੂੰ ਪਿਛਲੇ ਸਾਲ 20 ਸਾਲ ਦੀ ਕੈਦ ਦੀ ਸਜ਼ਾ ਹੋ ਚੁੱਕੀ ਹੈ, ਜਦਕਿ ਇਸ ਮਾਮਲੇ ਨਾਲ ਜੁੜੇ ਹੋਰ 49 ਲੋਕਾਂ ਨੂੰ ਵੀ ਸਜ਼ਾਵਾਂ ਹੋਈਆਂ।

ਪਰ ਹੁਣ ਅਦਾਲਤ ਦੇ ਸਾਹਮਣੇ ਇੱਕ ਹੋਰ ਆਦਮੀ 44 ਸਾਲਾ ਹੁਸਾਮੇਟਿਨ ਦੋਗਨ ਖੜਾ ਹੈ, ਜੋ ਆਪਣੀ ਬੇਗੁਨਾਹੀ ਦਾ ਦਾਅਵਾ ਕਰ ਰਿਹਾ ਹੈ। ਉਹ ਕਹਿੰਦਾ ਹੈ ਕਿ ਉਹ ਵੀ ਡੋਮਿਨਿਕ ਦਾ “ਸ਼ਿਕਾਰ” ਸੀ, ਅਤੇ ਉਸਨੇ ਸੋਚਿਆ ਸੀ ਕਿ ਇਹ ਇੱਕ “ਸਹਿਮਤ ਵਾਲਾ ਲਿਬਰਟਾਈਨ ਖੇਡ” ਸੀ। ਪਰ ਗੀਸੇਲ ਪੇਲੀਕੋਟ ਨੇ ਅਦਾਲਤ ਵਿੱਚ ਉਸਦੇ ਸਾਹਮਣੇ ਡਟ ਕੇ ਕਿਹਾ “ਤੂੰ ਕਿਸੇ ਵੀ ਤਰ੍ਹਾਂ ਪੀੜਤ ਨਹੀਂ। ਮੈਂ ਤੈਨੂੰ ਕਦੋਂ ਆਪਣੀ ਸਹਿਮਤੀ ਦਿੱਤੀ ਸੀ? ਕਦੇ ਨਹੀਂ। ਤੂੰ ਬਲਾਤਕਾਰੀ ਹੈਂ, ਤੇ ਮੈਨੂੰ ਤੇਰੇ ਉੱਤੇ ਸ਼ਰਮ ਹੈ।”

ਜਦੋਂ ਉਹ ਇਹ ਬੋਲ ਰਹੀ ਸੀ, ਅਦਾਲਤ ਦੇ ਹਾਲ ਵਿੱਚ ਪੂਰੀ ਚੁੱਪ ਛਾ ਗਈ। ਉਹ ਹਾਲੇ ਵੀ ਆਪਣੇ ਆਪ ਨੂੰ ਮਜ਼ਬੂਤ ਰੱਖਣ ਦੀ ਕੋਸ਼ਿਸ਼ ਕਰ ਰਹੀ ਸੀ, ਪਰ ਉਸਦੀ ਆਵਾਜ਼ ਵਿੱਚ ਸਾਲਾਂ ਦਾ ਦਰਦ ਸਾਫ਼ ਝਲਕ ਰਿਹਾ ਸੀ। ਉਸਨੇ ਕਿਹਾ, “ਮੈਂ ਚਾਹੁੰਦੀ ਹਾਂ ਕਿ ਇਹ ਮੇਰੀ ਆਖ਼ਰੀ ਅਦਾਲਤੀ ਹਾਜ਼ਰੀ ਹੋਵੇ। ਨੁਕਸਾਨ ਹੋ ਚੁੱਕਾ ਹੈ, ਹੁਣ ਮੈਨੂੰ ਆਪਣੇ ਟੁੱਟੇ ਜੀਵਨ ਨੂੰ ਦੁਬਾਰਾ ਜੋੜਨਾ ਹੈ।”

ਜਾਂਚਕਰਤਾਵਾਂ ਨੇ ਦੱਸਿਆ ਕਿ ਡੋਮਿਨਿਕ ਦੀ ਹਾਰਡ ਡਰਾਈਵ ਤੋਂ 107 ਤਸਵੀਰਾਂ ਅਤੇ 14 ਵੀਡੀਓ ਮਿਲੀਆਂ ਹਨ, ਜਿਹਨਾਂ ਵਿੱਚ ਦੋਗਨ ਵੀ ਸ਼ਾਮਲ ਹੈ। ਇਨ੍ਹਾਂ ਸਬੂਤਾਂ ਦੇ ਬਾਵਜੂਦ, ਦੋਗਨ ਦਾ ਜ਼ੋਰ ਹੈ ਕਿ ਉਸਨੇ ਕੁਝ ਗਲਤ ਨਹੀਂ ਕੀਤਾ। ਉਹ ਕਹਿੰਦਾ ਹੈ ਕਿ ਉਹ ਫਸ ਗਿਆ ਸੀ ਅਤੇ ਰੁਕਣਾ ਚਾਹੁੰਦਾ ਸੀ, ਪਰ ਡੋਮਿਨਿਕ ਨੇ ਉਸਨੂੰ ਯਕੀਨ ਦਿਵਾਇਆ ਕਿ ਸਭ ਠੀਕ ਹੈ।

ਪਰ ਡੋਮਿਨਿਕ ਨੇ ਜੇਲ੍ਹ ਤੋਂ ਬਾਹਰ ਆ ਕੇ ਅਦਾਲਤ ਵਿੱਚ ਕਿਹਾ ਕਿ ਦੋਗਨ ਇੱਕ ਇੱਛੁਕ ਭਾਗੀਦਾਰ ਸੀ ਅਤੇ ਉਸਨੂੰ ਪਤਾ ਸੀ ਕਿ ਉਸਦੀ ਪਤਨੀ ਬੇਹੋਸ਼ ਰਹੇਗੀ। ਇਹ ਬਿਆਨ ਸੁਣਕੇ ਗੀਸੇਲ ਦੀਆਂ ਅੱਖਾਂ ਵਿੱਚ ਹੰਝੂ ਆ ਗਏ।

ਗੀਸੇਲ ਪੇਲੀਕੋਟ ਹੁਣ ਜਿਨਸੀ ਹਿੰਸਾ ਵਿਰੁੱਧ ਲੜਾਈ ਦੀ ਇੱਕ ਆਵਾਜ਼ ਬਣ ਚੁੱਕੀ ਹੈ। ਉਸਦੇ ਹਿੰਮਤ ਭਰੇ ਬੋਲਾਂ ਨੇ ਫਰਾਂਸ ਦੇ ਕਾਨੂੰਨਾਂ ਵਿੱਚ ਤਬਦੀਲੀ ਦੀ ਲਹਿਰ ਚਲਾਈ। ਪਰ ਉਹ ਆਪਣੇ ਆਪ ਨੂੰ ਕੋਈ ਪ੍ਰਤੀਕ ਨਹੀਂ ਮੰਨਦੀ। “ਮੈਂ ਕੋਈ ਆਈਕਨ ਨਹੀਂ, ਮੈਂ ਇੱਕ ਆਮ ਔਰਤ ਹਾਂ ਜਿਸਨੇ ਸੱਚ ਬੋਲਣ ਦੀ ਹਿੰਮਤ ਕੀਤੀ,” ਉਸਨੇ ਕਿਹਾ।

ਉਹ ਚਾਹੁੰਦੀ ਹੈ ਕਿ ਉਸਦੀ ਕਹਾਣੀ ਹੋਰ ਔਰਤਾਂ ਲਈ ਹੌਸਲੇ ਦੀ ਨਿਸ਼ਾਨੀ ਬਣੇ “ਜਦੋਂ ਕੋਈ ਔਰਤ ਇੱਕ ਸਵੇਰ ਜਾਗਦੀ ਹੈ ਤੇ ਉਸਨੂੰ ਕੁਝ ਯਾਦ ਨਹੀਂ ਰਹਿੰਦਾ, ਉਹ ਮੇਰੇ ਬਾਰੇ ਸੋਚੇ ਤੇ ਜਾਣੇ ਕਿ ਇਹ ਉਸਦੀ ਗਲਤੀ ਨਹੀਂ।”

ਫਰਾਂਸ ਦੇ ਨਾਈਮਸ ਸ਼ਹਿਰ ਦੀ ਅਦਾਲਤ ਹੁਣ ਵੀਰਵਾਰ ਨੂੰ ਫ਼ੈਸਲਾ ਸੁਣਾਵੇਗੀ। ਪਰ ਗੀਸੇਲ ਪੇਲੀਕੋਟ ਲਈ ਇਹ ਕੇਵਲ ਇੱਕ ਅਦਾਲਤੀ ਮਾਮਲਾ ਨਹੀਂ ਇਹ ਉਸਦੀ ਇਜ਼ਤ, ਉਸਦੀ ਹਿੰਮਤ ਅਤੇ ਉਸਦੇ ਸੱਚ ਦੀ ਲੜਾਈ ਹੈ।