ਦੁਬਈ: ਦੁਬਈ ਵਿੱਚ ਸੋਨੇ ਦੀਆਂ ਕੀਮਤਾਂ ਵਿੱਚ ਅਚਾਨਕ ਵੱਡੀ ਕਮੀ ਆਈ ਹੈ। 24 ਕੈਰਟ ਸੋਨਾ ਹੁਣ 500 ਦਿਰਹਮ ਪ੍ਰਤੀ ਗ੍ਰਾਮ ਤੋਂ ਹੇਠਾਂ ਆ ਗਿਆ ਹੈ, ਜਿਸ ਨਾਲ ਉੱਥੇ ਰਹਿੰਦੇ ਲੋਕਾਂ ਅਤੇ ਸੈਲਾਨੀਆਂ ਲਈ ਸੋਨਾ ਖਰੀਦਣਾ ਹੁਣ ਕਾਫੀ ਸਸਤਾ ਹੋ ਗਿਆ ਹੈ।
ਤਾਜ਼ਾ ਜਾਣਕਾਰੀ ਮੁਤਾਬਕ, ਮਾਰਕੀਟ ਖੁੱਲ੍ਹਣ ਵੇਲੇ 24 ਕੈਰਟ ਸੋਨੇ ਦੀ ਕੀਮਤ ਲਗਭਗ 496.75 ਦਿਰਹਮ ਪ੍ਰਤੀ ਗ੍ਰਾਮ ਦਰਜ ਕੀਤੀ ਗਈ। ਇਸ ਤੋਂ ਪਹਿਲਾਂ ਇਹ ਕੀਮਤ 509.25 ਦਿਰਹਮ ਸੀ। ਇਸ ਤਰ੍ਹਾਂ ਇੱਕ ਹੀ ਦਿਨ ਵਿੱਚ ਕਰੀਬ 12 ਦਿਰਹਮ ਤੋਂ ਵੱਧ ਦੀ ਕਮੀ ਆਈ ਹੈ।
ਹੋਰ ਕੈਟੇਗਰੀਆਂ ਵਿੱਚ ਵੀ ਸੋਨੇ ਦੇ ਰੇਟ ਘਟੇ ਹਨ। 22 ਕੈਰਟ ਸੋਨਾ ਕਰੀਬ 460 ਦਿਰਹਮ ਪ੍ਰਤੀ ਗ੍ਰਾਮ ‘ਤੇ ਆ ਗਿਆ ਹੈ। 21 ਅਤੇ 18 ਕੈਰਟ ਦੇ ਸੋਨੇ ਦੀਆਂ ਕੀਮਤਾਂ ਵਿੱਚ ਵੀ ਕਮੀ ਦੇਖਣ ਨੂੰ ਮਿਲੀ ਹੈ, ਜਿਸ ਨਾਲ ਜੁਲਰੀ ਮਾਰਕੀਟ ਵਿੱਚ ਰੌਣਕ ਵੱਧ ਸਕਦੀ ਹੈ।
ਅੰਤਰਰਾਸ਼ਟਰੀ ਮਾਰਕੀਟ ਵਿੱਚ ਵੀ ਸੋਨੇ ‘ਤੇ ਦਬਾਅ ਬਣਿਆ ਹੋਇਆ ਹੈ। ਗਲੋਬਲ ਲੈਵਲ ‘ਤੇ ਸੋਨੇ ਦੀ ਕੀਮਤ ਵਿੱਚ ਕਰੀਬ 2 ਫੀਸਦੀ ਤੋਂ ਵੱਧ ਦੀ ਕਮੀ ਆਈ ਹੈ। ਨਾਲ ਹੀ ਚਾਂਦੀ ਦੀਆਂ ਕੀਮਤਾਂ ਵਿੱਚ ਵੀ ਵੱਡੀ ਗਿਰਾਵਟ ਦਰਜ ਕੀਤੀ ਗਈ ਹੈ।
ਮਾਹਿਰਾਂ ਦਾ ਕਹਿਣਾ ਹੈ ਕਿ ਇਹ ਕਮੀ ਮੁੱਖ ਤੌਰ ‘ਤੇ ਅਮਰੀਕਾ ਦੀਆਂ ਉੱਚੀਆਂ ਬਿਆਜ ਦਰਾਂ ਅਤੇ ਮਜ਼ਬੂਤ ਡਾਲਰ ਕਰਕੇ ਆਈ ਹੈ। ਜਦੋਂ ਬਿਆਜ ਦਰਾਂ ਵੱਧ ਹੁੰਦੀਆਂ ਹਨ ਤਾਂ ਲੋਕ ਸੋਨੇ ਦੀ ਬਜਾਏ ਹੋਰ ਨਿਵੇਸ਼ਾਂ ਵੱਲ ਵੱਧ ਧਿਆਨ ਦਿੰਦੇ ਹਨ।
ਇਸ ਤੋਂ ਇਲਾਵਾ, ਅਮਰੀਕਾ ਅਤੇ ਈਰਾਨ ਵਿਚਕਾਰ ਤਣਾਅ ਕੁਝ ਘਟਣ ਨਾਲ ਵੀ ਸੋਨੇ ਦੀ ਮੰਗ ‘ਚ ਕਮੀ ਆਈ ਹੈ, ਕਿਉਂਕਿ ਲੋਕ ਹੁਣ ਇਸਨੂੰ ਸੁਰੱਖਿਅਤ ਨਿਵੇਸ਼ ਵਜੋਂ ਘੱਟ ਤਰਜੀਹ ਦੇ ਰਹੇ ਹਨ।
ਹਾਲਾਂਕਿ, ਕਈ ਐਕਸਪਰਟਸ ਦਾ ਮੰਨਣਾ ਹੈ ਕਿ ਲੰਬੇ ਸਮੇਂ ਲਈ ਸੋਨਾ ਅਜੇ ਵੀ ਮਜ਼ਬੂਤ ਨਿਵੇਸ਼ ਰਹੇਗਾ। ਦੁਨੀਆ ਭਰ ਦੇ ਕੇਂਦਰੀ ਬੈਂਕ ਲਗਾਤਾਰ ਸੋਨਾ ਖਰੀਦ ਰਹੇ ਹਨ, ਜੋ ਭਵਿੱਖ ਵਿੱਚ ਕੀਮਤਾਂ ਨੂੰ ਸਹਾਰਾ ਦੇ ਸਕਦਾ ਹੈ।
ਇਸ ਲਈ ਜਿਹੜੇ ਲੋਕ ਵਿਆਹ-ਸ਼ਾਦੀ ਜਾਂ ਲੰਬੇ ਸਮੇਂ ਦੇ ਨਿਵੇਸ਼ ਲਈ ਸੋਨਾ ਖਰੀਦਣ ਦੀ ਸੋਚ ਰਹੇ ਹਨ, ਉਨ੍ਹਾਂ ਲਈ ਇਹ ਸਮਾਂ ਵਧੀਆ ਮੌਕਾ ਹੋ ਸਕਦਾ ਹੈ।
