ਨਿਊਜ਼ ਡੈਸਕ: ਏਅਰ ਇੰਡੀਆ ਨੇ ਵੱਧ ਰਹੇ ਖਰਚਿਆਂ ਅਤੇ ਅੰਤਰਰਾਸ਼ਟਰੀ ਹਾਲਾਤਾਂ ਨੂੰ ਦੇਖਦੇ ਹੋਏ ਅਗਸਤ 2026 ਤੱਕ ਕਈ ਅੰਤਰਰਾਸ਼ਟਰੀ ਉਡਾਣਾਂ ਨੂੰ ਅਸਥਾਈ ਤੌਰ ‘ਤੇ ਰੱਦ ਕਰਨ ਅਤੇ ਕੁਝ ਫਲਾਈਟਾਂ ਦੀ ਗਿਣਤੀ ਘਟਾਉਣ ਦਾ ਫੈਸਲਾ ਕੀਤਾ ਹੈ। ਏਅਰਲਾਈਨ ਦਾ ਕਹਿਣਾ ਹੈ ਕਿ ਜੈੱਟ ਫਿਊਲ ਦੀਆਂ ਵਧਦੀਆਂ ਕੀਮਤਾਂ, ਕੁਝ ਦੇਸ਼ਾਂ ਦੇ ਏਅਰਸਪੇਸ ‘ਤੇ ਪਾਬੰਦੀਆਂ ਅਤੇ ਵਧ ਰਹੇ ਓਪਰੇਸ਼ਨ ਖਰਚੇ ਇਸਦੇ ਮੁੱਖ ਕਾਰਨ ਹਨ।
ਜਾਣਕਾਰੀ ਮੁਤਾਬਕ ਜੂਨ ਤੋਂ ਅਗਸਤ 2026 ਦੇ ਦਰਮਿਆਨ ਕਈ ਮਹੱਤਵਪੂਰਨ ਅੰਤਰਰਾਸ਼ਟਰੀ ਰੂਟ ਪ੍ਰਭਾਵਿਤ ਰਹਿਣਗੇ। ਕੁਝ ਫਲਾਈਟਾਂ ਨੂੰ ਪੂਰੀ ਤਰ੍ਹਾਂ ਅਸਥਾਈ ਤੌਰ ‘ਤੇ ਬੰਦ ਕੀਤਾ ਜਾ ਰਿਹਾ ਹੈ, ਜਦਕਿ ਕਈ ਰੂਟਾਂ ‘ਤੇ ਉਡਾਣਾਂ ਦੀ ਗਿਣਤੀ ਘਟਾਈ ਜਾ ਰਹੀ ਹੈ। ਏਅਰ ਇੰਡੀਆ ਨੇ ਕਿਹਾ ਹੈ ਕਿ ਇਹ ਫੈਸਲਾ ਯਾਤਰੀਆਂ ਨੂੰ ਆਖਰੀ ਵੇਲੇ ਦੀ ਪਰੇਸ਼ਾਨੀ ਤੋਂ ਬਚਾਉਣ ਅਤੇ ਸੇਵਾ ਨੂੰ ਸਥਿਰ ਰੱਖਣ ਲਈ ਲਿਆ ਗਿਆ ਹੈ।
ਉੱਤਰੀ ਅਮਰੀਕਾ ਜਾਣ ਵਾਲੀਆਂ ਕਈ ਉਡਾਣਾਂ ‘ਤੇ ਸਭ ਤੋਂ ਵੱਧ ਅਸਰ ਪਿਆ ਹੈ। ਦਿੱਲੀ-ਸ਼ਿਕਾਗੋ ਅਤੇ ਦਿੱਲੀ-ਸ਼ੰਘਾਈ ਵਰਗੀਆਂ ਸੇਵਾਵਾਂ ਅਸਥਾਈ ਤੌਰ ‘ਤੇ ਬੰਦ ਕੀਤੀਆਂ ਗਈਆਂ ਹਨ। ਇਸ ਤੋਂ ਇਲਾਵਾ ਦਿੱਲੀ-ਸੈਨ ਫ੍ਰਾਂਸਿਸਕੋ, ਦਿੱਲੀ-ਟੋਰਾਂਟੋ ਅਤੇ ਦਿੱਲੀ-ਵੈਂਕੂਵਰ ਦੀਆਂ ਫਲਾਈਟਾਂ ਦੀ ਗਿਣਤੀ ਘਟਾਈ ਗਈ ਹੈ। ਮੁੰਬਈ-ਨਿਊਯਾਰਕ ਅਤੇ ਦਿੱਲੀ-ਨਿਊਆਰਕ ਵਰਗੀਆਂ ਸੇਵਾਵਾਂ ਵੀ ਪ੍ਰਭਾਵਿਤ ਹੋਈਆਂ ਹਨ।
ਯੂਰਪ ਅਤੇ ਆਸਟ੍ਰੇਲੀਆ ਦੇ ਕਈ ਰੂਟਾਂ ‘ਤੇ ਵੀ ਕਟੌਤੀ ਕੀਤੀ ਗਈ ਹੈ। ਦਿੱਲੀ ਤੋਂ ਪੈਰਿਸ, ਰੋਮ, ਜ਼ਿਊਰਿਖ, ਕੋਪਨਹੇਗਨ ਅਤੇ ਮਿਲਾਨ ਜਾਣ ਵਾਲੀਆਂ ਉਡਾਣਾਂ ਘੱਟ ਕੀਤੀਆਂ ਗਈਆਂ ਹਨ। ਇਸਦੇ ਨਾਲ ਹੀ ਦਿੱਲੀ-ਮੈਲਬਰਨ ਅਤੇ ਦਿੱਲੀ-ਸਿਡਨੀ ਫਲਾਈਟਾਂ ਵੀ ਪਹਿਲਾਂ ਨਾਲੋਂ ਘੱਟ ਚਲਾਈਆਂ ਜਾਣਗੀਆਂ।
ਏਸ਼ੀਆ ਅਤੇ ਦੱਖਣੀ ਏਸ਼ੀਆ ਦੇ ਕਈ ਰੂਟ ਵੀ ਇਸ ਤੋਂ ਪ੍ਰਭਾਵਿਤ ਹੋਏ ਹਨ। ਦਿੱਲੀ-ਸਿੰਗਾਪੁਰ, ਮੁੰਬਈ-ਸਿੰਗਾਪੁਰ, ਬੈਂਕਾਕ, ਕੁਆਲਾ ਲੰਪੁਰ, ਕਾਠਮੰਡੂ, ਢਾਕਾ ਅਤੇ ਕੋਲੰਬੋ ਜਾਣ ਵਾਲੀਆਂ ਫਲਾਈਟਾਂ ਦੀ ਗਿਣਤੀ ਘਟਾਈ ਗਈ ਹੈ। ਜਦਕਿ ਚੇਨਈ-ਸਿੰਗਾਪੁਰ ਅਤੇ ਮੁੰਬਈ-ਢਾਕਾ ਵਰਗੀਆਂ ਕੁਝ ਸੇਵਾਵਾਂ ਅਗਸਤ ਤੱਕ ਬੰਦ ਰਹਿਣਗੀਆਂ।
ਏਅਰ ਇੰਡੀਆ ਨੇ ਇਹ ਵੀ ਸਪਸ਼ਟ ਕੀਤਾ ਹੈ ਕਿ ਸਾਰੀਆਂ ਅੰਤਰਰਾਸ਼ਟਰੀ ਉਡਾਣਾਂ ਬੰਦ ਨਹੀਂ ਕੀਤੀਆਂ ਜਾ ਰਹੀਆਂ। ਏਅਰਲਾਈਨ ਹਰ ਮਹੀਨੇ 1,200 ਤੋਂ ਵੱਧ ਅੰਤਰਰਾਸ਼ਟਰੀ ਫਲਾਈਟਾਂ ਚਲਾਉਂਦੀ ਰਹੇਗੀ। ਜਿਨ੍ਹਾਂ ਯਾਤਰੀਆਂ ਦੀ ਫਲਾਈਟ ਪ੍ਰਭਾਵਿਤ ਹੋਵੇਗੀ, ਉਨ੍ਹਾਂ ਨੂੰ ਹੋਰ ਫਲਾਈਟ ਵਿੱਚ ਸੀਟ, ਮੁਫ਼ਤ ਤਾਰੀਖ ਬਦਲਣ ਦੀ ਸਹੂਲਤ ਜਾਂ ਪੂਰਾ ਰਿਫੰਡ ਦਿੱਤਾ ਜਾਵੇਗਾ।
ਮਾਹਰਾਂ ਦਾ ਕਹਿਣਾ ਹੈ ਕਿ ਮਿਡਲ ਈਸਟ ਵਿੱਚ ਵੱਧਦੇ ਤਣਾਅ ਅਤੇ ਏਅਰਸਪੇਸ ਪਾਬੰਦੀਆਂ ਕਾਰਨ ਜਹਾਜ਼ਾਂ ਨੂੰ ਲੰਬੇ ਰਸਤੇ ਲੈਣੇ ਪੈਂਦੇ ਹਨ, ਜਿਸ ਨਾਲ ਇੰਧਨ ਦਾ ਖਰਚਾ ਕਾਫੀ ਵੱਧ ਜਾਂਦਾ ਹੈ। ਇਸ ਤੋਂ ਇਲਾਵਾ ਯਾਤਰੀਆਂ ਦੀ ਮੰਗ ਵਿੱਚ ਕੁਝ ਕਮੀ ਵੀ ਆਈ ਹੈ, ਜਿਸ ਨਾਲ ਏਅਰਲਾਈਨਾਂ ‘ਤੇ ਆਰਥਿਕ ਦਬਾਅ ਵਧ ਰਿਹਾ ਹੈ।
