ਯੂਏਈ: ਯੂਏਈ ਵਿੱਚ ਰਹਿੰਦੇ ਇੱਕ ਭਾਰਤੀ ਪ੍ਰਵਾਸੀ ਦੀ ਕਿਸਮਤ ਉਸ ਵੇਲੇ ਚਮਕ ਉੱਠੀ ਜਦੋਂ ਉਸ ਨੇ ਯੂਏਈ ਲਾਟਰੀ ਦੇ ‘ਲੱਕੀ ਡੇ ਡਰਾਅ’ ਵਿੱਚ 3 ਕਰੋੜ ਦਿਰਹਮ (30 ਮਿਲੀਅਨ ਦਿਰਹਮ) ਦਾ ਜੈਕਪਾਟ ਜਿੱਤ ਲਿਆ। ਕੇਰਲ ਦੇ ਰਹਿਣ ਵਾਲੇ 52 ਸਾਲਾ ਸੁਨੀਲ ਕੁਮਾਰ ਸਦਾਸਿਵਨ, ਜੋ ਅਬੂ ਧਾਬੀ ਵਿੱਚ ਮੇਨਟੇਨੈਂਸ ਟੈਕਨੀਸ਼ੀਅਨ ਵਜੋਂ ਕੰਮ ਕਰਦੇ ਹਨ, ਇਸ ਲਾਟਰੀ ਦੇ ਦੂਜੇ ਗ੍ਰੈਂਡ ਪ੍ਰਾਈਜ਼ ਜੇਤੂ ਬਣੇ ਹਨ।
ਇਸ ਜਿੱਤ ਦੀ ਸਭ ਤੋਂ ਦਿਲਚਸਪ ਗੱਲ ਇਹ ਰਹੀ ਕਿ ਸੁਨੀਲ ਨੇ ਲਾਟਰੀ ਲਈ ਕੋਈ ਰੈਂਡਮ ਨੰਬਰ ਨਹੀਂ ਚੁਣੇ ਸਨ। ਉਨ੍ਹਾਂ ਨੇ ਆਪਣੀ ਧੀ, ਪਤਨੀ ਅਤੇ ਆਪਣੇ ਜਨਮ ਦਿਨ ਨਾਲ ਜੁੜੇ ਨੰਬਰਾਂ ਨੂੰ ਟਿਕਟ ਵਿੱਚ ਸ਼ਾਮਲ ਕੀਤਾ ਸੀ। ਸੁਨੀਲ ਨੇ ਦੱਸਿਆ ਕਿ ਸਭ ਤੋਂ ਪਹਿਲਾਂ ਉਨ੍ਹਾਂ ਨੇ ਆਪਣੀ ਧੀ ਦੀ ਜਨਮ ਮਿਤੀ ਚੁਣੀ, ਫਿਰ ਆਪਣੀ ਅਤੇ ਉਸ ਤੋਂ ਬਾਅਦ ਪਤਨੀ ਦੀ ਜਨਮ ਮਿਤੀ ਨਾਲ ਸਬੰਧਤ ਨੰਬਰ ਚੁਣੇ। ਇਹੀ ਨੰਬਰ ਉਨ੍ਹਾਂ ਲਈ ਕਰੋੜਾਂ ਦੀ ਜਿੱਤ ਲੈ ਕੇ ਆਏ।
ਸੁਨੀਲ ਨੇ ਇਹ ਟਿਕਟ ਆਪਣੇ ਇੱਕ ਦੋਸਤ ਨਾਲ ਮਿਲ ਕੇ ਖਰੀਦੀ ਸੀ। ਦੋਵਾਂ ਨੇ ਕੁਝ ਸਮਾਂ ਪਹਿਲਾਂ ਹੀ ਲਾਟਰੀ ਵਿੱਚ ਹਿੱਸਾ ਲੈਣਾ ਸ਼ੁਰੂ ਕੀਤਾ ਸੀ। ਪਹਿਲੀ ਟਿਕਟ ‘ਤੇ ਉਨ੍ਹਾਂ ਨੂੰ 100 ਦਿਰਹਮ ਦਾ ਛੋਟਾ ਇਨਾਮ ਮਿਲਿਆ ਸੀ। ਇਸ ਤੋਂ ਬਾਅਦ ਉਨ੍ਹਾਂ ਨੇ ਇੱਕ ਹੋਰ ਟਿਕਟ ਖਰੀਦੀ ਅਤੇ ਇਸ ਵਾਰ ਸਿੱਧਾ 3 ਕਰੋੜ ਦਿਰਹਮ ਦਾ ਜੈਕਪਾਟ ਆਪਣੇ ਨਾਮ ਕਰ ਲਿਆ।
ਸੁਨੀਲ ਲਈ ਉਨ੍ਹਾਂ ਦੀ ਧੀ ਨਾਲ ਜੁੜੇ ਨੰਬਰ ਸਿਰਫ਼ ਕਿਸਮਤ ਵਾਲੇ ਅੰਕ ਨਹੀਂ ਸਨ, ਸਗੋਂ ਭਾਵਨਾਤਮਕ ਮਹੱਤਵ ਵੀ ਰੱਖਦੇ ਸਨ। ਉਨ੍ਹਾਂ ਦੱਸਿਆ ਕਿ ਵਿਆਹ ਤੋਂ 12 ਸਾਲ ਬਾਅਦ ਉਨ੍ਹਾਂ ਦੇ ਘਰ ਧੀ ਦਾ ਜਨਮ ਹੋਇਆ ਸੀ। ਇਸ ਲਈ ਪਰਿਵਾਰ ਨੂੰ ਲੰਬੇ ਸਮੇਂ ਤੱਕ ਇੰਤਜ਼ਾਰ ਕਰਨਾ ਪਿਆ ਅਤੇ ਮਹਿੰਗੇ ਇਲਾਜ ਦਾ ਵੀ ਸਹਾਰਾ ਲੈਣਾ ਪਿਆ ਸੀ। ਇਸ ਕਾਰਨ ਧੀ ਦੀ ਜਨਮ ਮਿਤੀ ਉਨ੍ਹਾਂ ਲਈ ਬਹੁਤ ਖ਼ਾਸ ਬਣ ਗਈ।
ਜਦੋਂ ਡਰਾਅ ਦੇ ਨਤੀਜੇ ਐਲਾਨੇ ਗਏ ਤਾਂ ਸੁਨੀਲ ਨੇ ਰਾਤ ਕਰੀਬ 9:45 ਵਜੇ ਆਪਣੇ ਫ਼ੋਨ ‘ਤੇ ਨੰਬਰ ਚੈੱਕ ਕੀਤੇ। ਸ਼ੁਰੂ ਵਿੱਚ ਉਨ੍ਹਾਂ ਨੂੰ ਲੱਗਾ ਕਿ ਸ਼ਾਇਦ ਉਹ ਗਲਤ ਦੇਖ ਰਹੇ ਹਨ। ਜਦੋਂ ਉਨ੍ਹਾਂ ਨੇ ਟਿਕਟ ਨੂੰ ਦੁਬਾਰਾ ਚੈੱਕ ਕੀਤਾ ਤਾਂ ਉਨ੍ਹਾਂ ਨੂੰ ਯਕੀਨ ਹੋਇਆ ਕਿ ਉਹ 3 ਕਰੋੜ ਦਿਰਹਮ ਦੇ ਜੇਤੂ ਬਣ ਚੁੱਕੇ ਹਨ। ਇਸ ਤੋਂ ਬਾਅਦ ਉਨ੍ਹਾਂ ਨੇ ਆਪਣੇ ਇੱਕ ਦੋਸਤ ਨੂੰ ਟਿਕਟ ਦਿਖਾ ਕੇ ਪੁਸ਼ਟੀ ਕੀਤੀ ਅਤੇ ਫਿਰ ਪਤਨੀ ਨੂੰ ਫ਼ੋਨ ਕਰਕੇ ਇਹ ਖੁਸ਼ਖ਼ਬਰੀ ਦਿੱਤੀ।
ਸੁਨੀਲ ਨੇ ਕਿਹਾ ਕਿ ਉਨ੍ਹਾਂ ਦੀ ਪਤਨੀ ਹਮੇਸ਼ਾ ਸਾਦਾ ਜੀਵਨ ਜੀਉਣ ਵਿੱਚ ਵਿਸ਼ਵਾਸ ਰੱਖਦੀ ਹੈ। ਇੰਨੀ ਵੱਡੀ ਰਕਮ ਜਿੱਤਣ ਤੋਂ ਬਾਅਦ ਵੀ ਪਰਿਵਾਰ ਦੀ ਸੋਚ ਵਿੱਚ ਕੋਈ ਬਦਲਾਅ ਨਹੀਂ ਆਇਆ। ਉਨ੍ਹਾਂ ਦਾ ਕਹਿਣਾ ਹੈ ਕਿ ਇਸ ਰਕਮ ਦਾ ਇਸਤੇਮਾਲ ਸਿਰਫ਼ ਆਪਣੇ ਪਰਿਵਾਰ ਲਈ ਹੀ ਨਹੀਂ, ਸਗੋਂ ਲੋੜਵੰਦ ਲੋਕਾਂ ਦੀ ਮਦਦ ਲਈ ਵੀ ਕੀਤਾ ਜਾਵੇਗਾ। ਉਹ ਅਜਿਹੇ ਲੋਕਾਂ ਲਈ ਘਰ ਬਣਵਾਉਣ ਦੀ ਇੱਛਾ ਰੱਖਦੇ ਹਨ ਜਿਨ੍ਹਾਂ ਕੋਲ ਆਪਣਾ ਘਰ ਨਹੀਂ ਹੈ।
ਇਸ ਜਿੱਤ ਨਾਲ ਸੁਨੀਲ ਆਪਣੀ ਧੀ ਦੀ ਪੜ੍ਹਾਈ ‘ਤੇ ਨਿਵੇਸ਼ ਕਰਨਾ ਚਾਹੁੰਦੇ ਹਨ। ਉਨ੍ਹਾਂ ਦਾ ਸੁਪਨਾ ਹੈ ਕਿ ਉਨ੍ਹਾਂ ਦੀ ਧੀ ਡਾਕਟਰ ਬਣੇ। ਇਸ ਦੇ ਨਾਲ ਹੀ ਉਹ ਆਪਣੇ ਪਰਿਵਾਰ ਦਾ ਅਧੂਰਾ ਘਰ ਪੂਰਾ ਕਰਨਾ ਚਾਹੁੰਦੇ ਹਨ ਅਤੇ ਸਾਲਾਂ ਦੀ ਮਿਹਨਤ ਤੋਂ ਬਾਅਦ ਕੁਝ ਸਮਾਂ ਆਰਾਮ ਨਾਲ ਬਿਤਾਉਣਾ ਚਾਹੁੰਦੇ ਹਨ। ਉਨ੍ਹਾਂ ਮੁਤਾਬਕ ਨੌਕਰੀ ਤੋਂ ਘਰ ਵਾਪਸ ਆਉਣ ਤੋਂ ਬਾਅਦ ਇੰਨੀ ਵੱਡੀ ਖੁਸ਼ਖ਼ਬਰੀ ਮਿਲਣਾ ਕਿਸੇ ਸੁਪਨੇ ਦੇ ਸੱਚ ਹੋਣ ਵਰਗਾ ਸੀ।
ਸੁਨੀਲ ਨੇ ਇਹ ਵੀ ਕਿਹਾ ਕਿ ਇਨਾਮ ਦੀ ਰਕਮ ਮਿਲਣ ਤੋਂ ਬਾਅਦ ਸਭ ਤੋਂ ਪਹਿਲਾਂ ਉਹ ਆਪਣੀ ਧੀ ਲਈ ਇੱਕ ਖ਼ਾਸ ਤੋਹਫ਼ਾ ਖਰੀਦਣਗੇ। ਉਨ੍ਹਾਂ ਦੇ ਅਨੁਸਾਰ ਇਹ ਜਿੱਤ ਸਿਰਫ਼ ਪੈਸਿਆਂ ਦੀ ਨਹੀਂ, ਸਗੋਂ ਉਨ੍ਹਾਂ ਦੇ ਪਰਿਵਾਰ ਦੇ ਸੰਘਰਸ਼, ਸਬਰ ਅਤੇ ਉਮੀਦਾਂ ਦੀ ਵੀ ਜਿੱਤ ਹੈ।
ਯੂਏਈ ਲਾਟਰੀ ਦਾ ‘ਲੱਕੀ ਡੇ ਡਰਾਅ’ ਹਰ ਬੁੱਧਵਾਰ ਅਤੇ ਸ਼ਨੀਵਾਰ ਰਾਤ ਨੂੰ ਕੱਢਿਆ ਜਾਂਦਾ ਹੈ। ਇਸ ਵਿੱਚ 3 ਕਰੋੜ ਦਿਰਹਮ ਦਾ ਗ੍ਰੈਂਡ ਪ੍ਰਾਈਜ਼, 50 ਲੱਖ ਦਿਰਹਮ ਦਾ ਦੂਜਾ ਇਨਾਮ ਅਤੇ 50-50 ਹਜ਼ਾਰ ਦਿਰਹਮ ਦੇ ਤਿੰਨ ‘ਲੱਕੀ ਚਾਂਸ’ ਇਨਾਮ ਦਿੱਤੇ ਜਾਂਦੇ ਹਨ। ਅਧਿਕਾਰੀਆਂ ਮੁਤਾਬਕ ਇਹ ਜਿੱਤ ਯੂਏਈ ਲਾਟਰੀ ਦੇ ਇਤਿਹਾਸ ਵਿੱਚ ਹਾਲੀਆ ਸਮੇਂ ਦੀਆਂ ਸਭ ਤੋਂ ਵੱਡੀਆਂ ਜਿੱਤਾਂ ਵਿੱਚੋਂ ਇੱਕ ਹੈ।
