ਦੁਬਈ: ਦੁਬਈ ਵਿੱਚ ਰਹਿਣ ਵਾਲੇ ਲੋਕਾਂ ਲਈ ਜਲਦੀ ਹੀ ਇੱਕ ਨਵੀਂ ਅਤੇ ਆਧੁਨਿਕ ਸਹੂਲਤ ਆਉਣ ਵਾਲੀ ਹੈ। ਹੁਣ ਲੋਕ ਪਾਰਕਾਂ ਅਤੇ ਬੀਚ ‘ਤੇ ਬੈਠੇ-ਬੈਠੇ ਹੀ ਆਪਣੇ ਖਾਣ-ਪੀਣ ਜਾਂ ਹੋਰ ਸਮਾਨ ਦਾ ਆਰਡਰ ਡਰੋਨ ਰਾਹੀਂ ਮੰਗਵਾ ਸਕਣਗੇ। ਦੁਬਈ ਮਿਊਂਸਿਪੈਲਿਟੀ ਨੇ Keeta Drone ਕੰਪਨੀ ਨਾਲ ਮਿਲ ਕੇ ਇਸ ਪ੍ਰੋਜੈਕਟ ‘ਤੇ ਕੰਮ ਸ਼ੁਰੂ ਕਰ ਦਿੱਤਾ ਹੈ।
ਰਿਪੋਰਟ ਮੁਤਾਬਕ ਇਸ ਸਾਲ ਦੇ ਅਖੀਰ ਤੱਕ ਕੁਝ ਚੁਣਿੰਦੇ ਪਾਰਕਾਂ ਅਤੇ ਬੀਚਾਂ ‘ਤੇ ਡਰੋਨ ਡਿਲਿਵਰੀ ਦਾ ਟ੍ਰਾਇਲ ਸ਼ੁਰੂ ਕੀਤਾ ਜਾਵੇਗਾ। ਜੇ ਇਹ ਟ੍ਰਾਇਲ ਕਾਮਯਾਬ ਰਹਿੰਦਾ ਹੈ ਤਾਂ ਇਸ ਸੇਵਾ ਨੂੰ ਹੌਲੀ-ਹੌਲੀ ਪੂਰੇ ਸ਼ਹਿਰ ਵਿੱਚ ਵਧਾਇਆ ਜਾਵੇਗਾ। ਇਸ ਯੋਜਨਾ ਦਾ ਮਕਸਦ ਲੋਕਾਂ ਨੂੰ ਤੇਜ਼ ਅਤੇ ਆਸਾਨ ਡਿਲਿਵਰੀ ਸਹੂਲਤ ਦੇਣਾ ਹੈ ਤਾਂ ਜੋ ਉਹਨਾਂ ਨੂੰ ਆਪਣੀ ਜਗ੍ਹਾ ਤੋਂ ਉੱਠਣ ਦੀ ਲੋੜ ਨਾ ਪਵੇ।
ਦੁਬਈ ਮਿਊਂਸਿਪੈਲਿਟੀ ਇਸ ਪ੍ਰੋਜੈਕਟ ਲਈ ਉਹਨਾਂ ਥਾਵਾਂ ਦੀ ਪਛਾਣ ਕਰੇਗੀ ਜਿੱਥੇ ਡਰੋਨ ਸੁਰੱਖਿਅਤ ਢੰਗ ਨਾਲ ਉਡਾਣ ਭਰ ਸਕਣ ਅਤੇ ਸਮਾਨ ਪਹੁੰਚਾ ਸਕਣ। ਦੂਜੇ ਪਾਸੇ Keeta Drone ਕੰਪਨੀ ਡਿਲਿਵਰੀ ਰੂਟ ਤਿਆਰ ਕਰੇਗੀ, ਡਰੋਨ ਦੀ ਟੈਸਟਿੰਗ ਕਰੇਗੀ ਅਤੇ ਸਾਰੀ ਤਕਨੀਕੀ ਜ਼ਿੰਮੇਵਾਰੀ ਸੰਭਾਲੇਗੀ। ਇਸ ਦੌਰਾਨ ਸੁਰੱਖਿਆ ਨਿਯਮਾਂ ਦਾ ਵੀ ਖ਼ਾਸ ਧਿਆਨ ਰੱਖਿਆ ਜਾਵੇਗਾ।
ਕੰਪਨੀ ਦੇ ਅਧਿਕਾਰੀਆਂ ਨੇ ਦੱਸਿਆ ਕਿ ਉਹਨਾਂ ਦਾ ਮਕਸਦ ਲੋਕਾਂ ਤੱਕ ਸੇਵਾਵਾਂ ਉੱਥੇ ਪਹੁੰਚਾਉਣਾ ਹੈ ਜਿੱਥੇ ਉਹ ਆਪਣਾ ਸਮਾਂ ਬਿਤਾਉਂਦੇ ਹਨ, ਜਿਵੇਂ ਪਾਰਕ, ਬੀਚ ਅਤੇ ਹੋਰ ਸਰਕਾਰੀ ਥਾਵਾਂ। ਡਰੋਨ ਡਿਲਿਵਰੀ ਨਾਲ ਲੋਕਾਂ ਨੂੰ ਤੇਜ਼, ਆਸਾਨ ਅਤੇ ਸੁਵਿਧਾਜਨਕ ਤਜਰਬਾ ਮਿਲੇਗਾ।
ਜਾਣਕਾਰੀ ਮੁਤਾਬਕ Keeta Drone ਕੰਪਨੀ ਪਹਿਲਾਂ ਹੀ ਚੀਨ, ਹਾਂਗਕਾਂਗ ਅਤੇ ਦੁਬਈ ਵਰਗੇ ਸ਼ਹਿਰਾਂ ਵਿੱਚ 8.8 ਲੱਖ ਤੋਂ ਵੱਧ ਡਿਲਿਵਰੀ ਕਰ ਚੁੱਕੀ ਹੈ। ਕੰਪਨੀ ਦਾ ਕਹਿਣਾ ਹੈ ਕਿ ਇਸ ਨਾਲ ਸਮਾਂ ਬਚੇਗਾ, ਟ੍ਰੈਫਿਕ ਘਟੇਗਾ ਅਤੇ ਵਾਤਾਵਰਣ ਨੂੰ ਵੀ ਫਾਇਦਾ ਹੋਵੇਗਾ।
ਦੁਬਈ ਪਹਿਲਾਂ ਤੋਂ ਹੀ ਸਮਾਰਟ ਸਿਟੀ ਅਤੇ ਨਵੀਂ ਤਕਨਾਲੋਜੀ ‘ਤੇ ਤੇਜ਼ੀ ਨਾਲ ਕੰਮ ਕਰ ਰਿਹਾ ਹੈ। ਇਸ ਤੋਂ ਪਹਿਲਾਂ ਵੀ ਇੱਥੇ ਡਰੋਨ ਨਾਲ ਜੁੜੇ ਕਈ ਪ੍ਰੋਜੈਕਟ ਸ਼ੁਰੂ ਹੋ ਚੁੱਕੇ ਹਨ। ਅਧਿਕਾਰੀਆਂ ਦਾ ਕਹਿਣਾ ਹੈ ਕਿ ਇਹ ਨਵੀਂ ਸਹੂਲਤ ਦੁਬਈ ਨੂੰ ਹੋਰ ਵੀ ਆਧੁਨਿਕ ਸ਼ਹਿਰ ਬਣਾਉਣ ਵੱਲ ਇੱਕ ਵੱਡਾ ਕਦਮ ਹੈ।
