ਦੁਬਈ: ਦੁਬਈ ਦਾ ਮਸ਼ਹੂਰ ਅਲ ਮਮਜ਼ਰ ਬੀਚ ਹੁਣ ਨਵੇਂ ਅਤੇ ਆਧੁਨਿਕ ਰੂਪ ਵਿੱਚ ਲੋਕਾਂ ਲਈ ਮੁੜ ਖੋਲ੍ਹ ਦਿੱਤਾ ਗਿਆ ਹੈ। ਲਗਭਗ 50 ਕਰੋੜ ਦਿਰਹਮ ਦੀ ਲਾਗਤ ਨਾਲ ਇਸ ਬੀਚ ਦਾ ਵੱਡੇ ਪੱਧਰ ‘ਤੇ ਨਵੀਨੀਕਰਨ ਕੀਤਾ ਗਿਆ ਹੈ, ਜਿਸ ਤੋਂ ਬਾਅਦ ਇੱਥੇ ਆਉਣ ਵਾਲੇ ਲੋਕਾਂ ਨੂੰ ਪਹਿਲਾਂ ਨਾਲੋਂ ਕਾਫੀ ਵਧੀਆ ਸਹੂਲਤਾਂ ਮਿਲਣਗੀਆਂ। ਦੁਬਈ ਮਿਊਂਸਪੈਲਿਟੀ ਮੁਤਾਬਕ ਇਸ ਪ੍ਰੋਜੈਕਟ ਦਾ ਮਕਸਦ ਸ਼ਹਿਰ ਦੇ ਸਮੁੰਦਰੀ ਤੱਟਾਂ ਨੂੰ ਹੋਰ ਆਧੁਨਿਕ ਬਣਾਉਣਾ ਅਤੇ ਸਥਾਨਕ ਲੋਕਾਂ ਨਾਲ ਨਾਲ ਸੈਲਾਨੀਆਂ ਨੂੰ ਵੀ ਬਿਹਤਰ ਤਜਰਬਾ ਦੇਣਾ ਹੈ।
ਨਵੇਂ ਤਰੀਕੇ ਨਾਲ ਤਿਆਰ ਕੀਤੇ ਗਏ ਅਲ ਮਮਜ਼ਰ ਬੀਚ ਨੂੰ ਦੋ ਹਿੱਸਿਆਂ ਵਿੱਚ ਵੰਡਿਆ ਗਿਆ ਹੈ। ਪਹਿਲਾ ਹਿੱਸਾ “ਅਲ ਮਮਜ਼ਰ ਲੈਗੂਨ ਬੀਚ” ਹੈ, ਜੋ ਲਗਭਗ 27.5 ਲੱਖ ਵਰਗ ਫੁੱਟ ਖੇਤਰ ਵਿੱਚ ਫੈਲਿਆ ਹੋਇਆ ਹੈ। ਇੱਥੇ 300 ਮੀਟਰ ਲੰਮਾ ਨਾਈਟ ਸਵਿਮਿੰਗ ਬੀਚ ਬਣਾਇਆ ਗਿਆ ਹੈ, ਜਿੱਥੇ ਲੋਕ ਰਾਤ ਦੇ ਸਮੇਂ ਵੀ ਸਮੁੰਦਰ ਦਾ ਆਨੰਦ ਲੈ ਸਕਣਗੇ। ਇਸ ਤੋਂ ਇਲਾਵਾ ਬੱਚਿਆਂ ਲਈ ਖੇਡਣ ਵਾਲੀ ਜਗ੍ਹਾ, ਓਪਨ ਜਿਮ, ਵਾਟਰ ਸਪੋਰਟਸ ਜ਼ੋਨ, ਜੈੱਟ ਸਕੀ ਡੌਕ ਅਤੇ ਪਰਿਵਾਰਾਂ ਲਈ ਛਾਂ ਵਾਲੀਆਂ ਬੈਠਣ ਦੀਆਂ ਥਾਵਾਂ ਵੀ ਬਣਾਈਆਂ ਗਈਆਂ ਹਨ।
ਦੂਜਾ ਹਿੱਸਾ “ਅਲ ਮਮਜ਼ਰ ਕੋਰਨੀਸ਼” ਹੈ, ਜਿਸ ਨੂੰ ਹੋਰ ਸ਼ਾਂਤ ਅਤੇ ਪ੍ਰੀਮੀਅਮ ਤਜਰਬਾ ਦੇਣ ਲਈ ਤਿਆਰ ਕੀਤਾ ਗਿਆ ਹੈ। ਇੱਥੇ ਦੁਨੀਆ ਦਾ ਪਹਿਲਾ 24 ਘੰਟੇ ਖੁੱਲ੍ਹਾ ਰਹਿਣ ਵਾਲਾ ਔਰਤਾਂ ਲਈ ਖਾਸ ਬੀਚ ਬਣਾਇਆ ਗਿਆ ਹੈ। ਇਸ ਨੂੰ ਪੂਰੀ ਤਰ੍ਹਾਂ ਸੁਰੱਖਿਅਤ ਅਤੇ ਨਿੱਜੀ ਮਾਹੌਲ ਦੇਣ ਲਈ ਚਾਰੋਂ ਪਾਸਿਆਂ ਤੋਂ ਕਵਰ ਕੀਤਾ ਗਿਆ ਹੈ। ਇਸ ਇਲਾਕੇ ਵਿੱਚ ਆਰਟ ਵਾਕਵੇ, ਖੇਡ ਸਹੂਲਤਾਂ ਅਤੇ ਵੱਖ-ਵੱਖ ਮੌਸਮੀ ਪ੍ਰੋਗਰਾਮ ਕਰਵਾਉਣ ਲਈ ਖਾਸ ਜਗ੍ਹਾ ਵੀ ਬਣਾਈ ਗਈ ਹੈ।
ਇਸ ਪ੍ਰੋਜੈਕਟ ਦੀ ਸਭ ਤੋਂ ਖਾਸ ਗੱਲ ਫਲੋਟਿੰਗ ਵਾਕਵੇ ਨੂੰ ਮੰਨਿਆ ਜਾ ਰਿਹਾ ਹੈ, ਜੋ ਅਲ ਮਮਜ਼ਰ ਲੈਗੂਨ ਅਤੇ ਅਲ ਮਮਜ਼ਰ ਕੋਰਨੀਸ਼ ਨੂੰ ਆਪਸ ਵਿੱਚ ਜੋੜਦਾ ਹੈ। ਇਸ ਦੇ ਨਾਲ ਹੀ ਇੱਥੇ 5.5 ਕਿਲੋਮੀਟਰ ਲੰਮਾ ਰਨਿੰਗ ਅਤੇ ਸਾਈਕਲਿੰਗ ਟਰੈਕ ਵੀ ਤਿਆਰ ਕੀਤਾ ਗਿਆ ਹੈ। ਅਧਿਕਾਰੀਆਂ ਮੁਤਾਬਕ ਇਹ ਟਰੈਕ ਪਹਿਲਾਂ ਨਾਲੋਂ ਕਾਫੀ ਵੱਡਾ ਅਤੇ ਬਿਹਤਰ ਬਣਾਇਆ ਗਿਆ ਹੈ। ਬੀਚ ਦੇ ਨੇੜੇ ਵਾਟਰਫਰੰਟ ਰੈਸਟੋਰੈਂਟ ਵੀ ਬਣਾਇਆ ਜਾਵੇਗਾ, ਜਿਸ ਨਾਲ ਸੈਲਾਨੀਆਂ ਨੂੰ ਨਵਾਂ ਤਜਰਬਾ ਮਿਲੇਗਾ।
ਇੱਥੇ ਆਉਣ ਵਾਲੇ ਲੋਕ ਹੁਣ ਜੈੱਟ ਸਕੀ, ਕਾਇਕਿੰਗ, ਪੈਡਲ ਬੋਟਿੰਗ ਅਤੇ ਫਲਾਈਬੋਰਡਿੰਗ ਵਰਗੀਆਂ ਕਈ ਵਾਟਰ ਐਕਟਿਵਿਟੀਆਂ ਦਾ ਆਨੰਦ ਵੀ ਲੈ ਸਕਣਗੇ। ਸੁਰੱਖਿਆ ਨੂੰ ਧਿਆਨ ਵਿੱਚ ਰੱਖਦੇ ਹੋਏ ਮੋਟਰ ਵਾਲੀਆਂ ਅਤੇ ਬਿਨਾਂ ਮੋਟਰ ਵਾਲੀਆਂ ਗਤੀਵਿਧੀਆਂ ਲਈ ਵੱਖ-ਵੱਖ ਜ਼ੋਨ ਬਣਾਏ ਗਏ ਹਨ, ਤਾਂ ਜੋ ਲੋਕ ਸੁਰੱਖਿਅਤ ਢੰਗ ਨਾਲ ਆਪਣੀ ਮਨਪਸੰਦ ਐਕਟਿਵਿਟੀ ਕਰ ਸਕਣ।
ਦੁਬਈ ਪ੍ਰਸ਼ਾਸਨ ਦਾ ਅੰਦਾਜ਼ਾ ਹੈ ਕਿ ਬੀਚ ਮੁੜ ਖੁੱਲ੍ਹਣ ਤੋਂ ਬਾਅਦ ਪਹਿਲੇ ਸਾਲ ਵਿੱਚ ਲਗਭਗ 70 ਲੱਖ ਲੋਕ ਇੱਥੇ ਘੁੰਮਣ ਲਈ ਆ ਸਕਦੇ ਹਨ। ਇਹ ਪ੍ਰੋਜੈਕਟ ਦੁਬਈ ਦੇ 3 ਅਰਬ ਦਿਰਹਮ ਵਾਲੇ ਵੱਡੇ ਬੀਚ ਡਿਵੈਲਪਮੈਂਟ ਪਲਾਨ ਦਾ ਹਿੱਸਾ ਹੈ, ਜਿਸ ਦਾ ਮਕਸਦ ਸ਼ਹਿਰ ਦੇ ਬੀਚਾਂ ਦੀ ਸਮਰੱਥਾ ਵਿੱਚ ਲਗਭਗ 170 ਫੀਸਦੀ ਤੱਕ ਵਾਧਾ ਕਰਨਾ ਹੈ।
